حماده عزو واليوم السابع

يمكن أغلبنا يعرف موقع جريدة اليوم السابع وبصراحه من ساعة لما الموقع اتفتح وانا بتابعه با ستمرار
لكن الملفت للنظر انه انا ملاحظ والكثيرين ايضا انه الجريده بتتفنن في احداث فتنه بين المسلميين والمسيحيين
وانا بوصفها بأنها متعمده يعني ميعديش يومين تلاته بالكتير الا لما يجيبوا مقاله او خبر فعلا مش وراه غير فتنه وخلاص دا غير ان العنوان طبعا بتاع المقاله ده يشدك اوي وتلاقي التعليقات بسم الله ما شاء الله كتيييير وبصراحه مش عارف ايه هدف الجريده من ورا اثارة المواضيع دي وكان اخرها موضوع التكفير والنصارى والجزية.. كلمات من التراث الإسلامى.. تغضب الأقباط
سبحان الله المسلمييين والمسيحيين عايشيين هنا في مصر محدش سمع عن المواضيع دي خالص ولا اتكلم فيها ولا حد اتدايق
تيجي بقي ليه اليوم السابع وتتكلم في موضوع زي ده الله أعلم
ومواضييع كتيير من عينة المواضييع دي ان المسيحيين مظلوميين ومقهوريين والاعجاز العلمي في الانجيل وشاب مسيحي سرق واحد مسلم وشاب مسلم عاكس فتاه مسيحيه وافلام هندي كتيير كده مبيجيش من وراها غير تداخل وسباب بين بعض المعلقين من الطرفين او سب الجريده نفسها لاثارتها المواضيع دي

اعتقد انه في مصر مسلميين ومسيحيين نحيا جميعا في اضطهاد وظلم وقهر في ظل هذا الحكم الطاغي الذي لا يفرق بين مسلم ومسيحيي

وفي النهايه... مرة واحد مسيحي راح للريس, قاله يا ريس هو ممكن واحد مسيحي يبقى رئيس جمهورية؟ قاله و لا مسلم يا روح امك