أعتقد إن أغلب مستخدمي الشبكه العنكبوتيه تابعوا موضوع سياسة أم عادل اللي نزلتها وزارة الاتصالات بالتنسيق مع شركات الانترنت في مصر
وكان ملخص السياسه دي إنهم هيحددوا سرعات النت في مصر كلها
يعني مثلا اللي سرعته 512 هيبقي ليه داونلود 25جيجا شهريا فقط والجيجا الزياده ب10 بجنيه.....يا بلاش
وطبقا للسياسة بتاعة ام عادل دي ان كده هيبقي كل الانترنت في مصر محدود
وبهذا تكون أخذت مصر دور الرياده والسبق وحصري للشعب المصري موضوع تحديد الانترنت
بعد القرار دا لما نزل الصراحه كان فيه شباب كتيير إيجابيين سواء علي المنتديات أو الفيسبوك قاموا بعمل حملات كنسلة للخطوط وفضح لهذه السياسة والمؤامرة من شركات الانترنت بالتعاون مع وزارة الاتصالات لقرطسة الشعب
وكان نتيجة لهذه الحملات إن فيه ناس كتيير بالفعل كنسلوا اشتراكاتهم وناس تانيه قللت سرعاتها دا غير الوقفات اللي اتعملت امام مقرات بعض الشركات كنوع من انواع الاحتجاج علي القرطسه دي
رد فعل وزارة الاتصالات علي الاحتجاجات دي كان سريع الصراحه وقام الوزير طارق كامل في تصريح قال شوية حاجات في ظاهرها الحلاوة ولكن تفاصيلها لا تنم الا عن حكومة خبيثة ناوية تقرطس الناس يعني هتقرطسهم
الراجل قال ان الموضوع بتاع ام عادل دا هيتلغي واللي هيتعمل كتاتي:
الناس المشتركه بالفعل دي هتفضل زي ما هيا (العملاء القدامي) يعني داونلود زي مانت عاوز
الناس اللي هتشترك جديد (العملاء الجدد) دول هيطبق عليهم نظام ام عادل لمدة شهرين
وبعد الشهرين هيقيموا السياسه دي ومدي تطبيقها ونجاحها ويشوفوا هيعملوا ايه
ملخص خطة الحكومه هنا ايييه؟
انهم قسموا الناس وفرقوهم لعملاء جدد وقدامي
القدامي مش متضررين دلوقتي فهيسكتوا ويفرحوا لانهم زي ماهما داونلود زي مانت عاوز وعيش يا معلم
الجدد بقي فدول اللي بقوا حقل التجربة وهيطبق عليهم النظام الجديد ويا عيني قاعدين مقهورين لانهم مضطهدين
نيجي بقي بعد الشهرين الحكومه تقولك ان الراجل صاحب سياسة ام عادل وعادل و ابو عادل دا راجل عبقري
والسياسة اثبتت نجاحها الفوق الفظيع وتحت المريب لدرجة ان باقي دول العالم بيفكروا يستوردوها من عندنا
ولذلك احنا هنقرر السياسه دي علي كل مصر سواء جدد او قدامي
هنا بقي الناس الجدد الموضوع بالنسبه لهم هيكون عادي لانهم كده كده القرار مطبق اصلا عليهم بالعكس دا دلوقتي مبقاش فيه حد احسن من حد
نيجي بقي للقدامي اللي الموضوع هيطبقي عليهم لما يجوا يحتجوا ميين هيقف جنبهم؟
الجدد ماهو محدش وقف جنبهم وبالتالي مش هيقفوا جنبهم
كمان ساعتها هيبقي فيه شوية رسوم بيانيه وتقارير حكوميه بتوضح نجاح السياسة دي عشان يحطوها في عين اتخن طويل فيكي يا بلد
دا غير ان شهرين دوول كافيين لتنييم حماسة معظم الشباب دي
ويا شماته انترنت كافيه ام حسينوفيتش بتاع روسيا فينا
وبالتالي ان المفروض يحصل ان الناس تستمر في حملتها وثورتها ضد هذه السياسات ونصب الشركات دي علينا
وان كل المستخدمين يفضلوا علي اهبة الاستعداد لكنسلة خطوطهم مع استمرار وقوفهم جنب الناس اللي هتشترك من جديد زي ما حصل مثلا علي منتدي الديفيدي او علي جروب الحمله ع الفيس بوك
و النت خلاص ياعالم ...للغني والمريش
مع السرعه المحدوده ...كلنا هنروح نشيش
إدونا سرعه زياده ...وفرحنا بالإحسان
أهو لا بقي فيه أفلام...ولاحتي الشيخ حسان
وإيييييييييييييييييييييييييييييييييييييييه
