يمكن أغلبنا كان سمع عن إن الحكومه المبجله بتاعتنا قفشت قصدي صادرت من أيمن طه القيادي بحماس حوالي 11 مليون دولار
ودي كانت تبرعات رايحه لأهل غزة وازاي طبعا الفلوس دي تخش لاهل غزة ودا بيتنافي تماما مع الاتفاقيه اللي موقعاها مصر مع الصهاينه
والمسماه باتفاقية أم ترتر
واللي من بنودها تجويع وقتل الشعب الفلسطيني ودلدلة الرأس للصهاينه
ومد يد العون والمساعده لاقامة الدوله المزعومه من النيل للفرات
بس دا طبعا عند ام تي تي مش ام ترتر....... فيه فرق بين الاتنين طبعا
الحكومه ساعتها اتحججت وقالت إنه لازم الفلوس دي تدخل البنوك المصريه وناخد إذن من وزير الماليه عشان يسمح لتحويلها لبنوك غزة ومن هناك بقي يتم صرفها ........ياعيني علي الصبر
ودا اعمالا بالحكمه اللي بتقول ودنك منين يا جحا
اللي حصل بقي من يومين ان الحكومه الامريكيه صادرت الفلوس دي كلها واللي كانت موجوده بالبنك الاهلي ودا تحت بند ان حركة حماس منظمه إرهابيه وعليها تعويضات تقدر ب116 مليون دولار نتيجة العمليات الارهابيه اللي بتعملها
نفسي اقول كلمه مش ولابد بس للأسف أنا متوضي
واحده بتسالني بتقولي طب وده تحت اي قانون ان امريكا تعمل كده
طبعا انا قلتلها ان ده من بنود اتفاقية ام ترتر واللي برده من بنودها
إنك طالما هتدلدل راسك للصهاينه يبقي من الاولي بيك انك تدلدلها لامريكا وبناء علي البند ده امريكا صادرت الفلوس
طيب انا دلوقتي عاوز افهم حاجه
لحد امتي هتفضل الحكومه تتصرف بالتعنت والهمجيه والموالاه التامه للصهاينه بالشكل ده؟؟
ولحد امتي فصائل المعارضه المصريه هتفضل ترقص علي السلم والناس هناك بتموت مش لاقيه لقمة العيش؟؟
ولحد امتي هيفضل الشعب عايش في سلبيه ولا مبالاه تجاه قضية فلسطين وتحرير الأقصي؟؟
وفي الاخر عاوز اقول اخر واهم بند من بنود اتفاقية ام ترتر
علي كل من يقرأ التدوينه دي أن يدفع لصاحبها كل اللي في جيبه وهو بيقراها لانه مزنوق شويه الايام دي
والدفع كااااااااااااااااااااش
