حماده عزو: يناير 2009

شرح المثل الشعبى المصرى

وصلتني الرساله الآتيه

شرح المثل الشعبى المصرى:

س1: بما تصف العلاقات المصرية الاسرائيلية؟
ج1: يا بخت من بات مظلوم و مبتش ظالم

س2: بما تفسر الموقف العربى أمام الأوضاع فى غزة؟
ج2: إذا كان الكلام من فضة فالسكوت من ذهب

س3: بما تصف العلاقات المصرية الأمريكية؟
ج3: اللى أكله ما هو من فأسه ... رأيه ما هو من رأسه

س4: بما تصف سياسة مصر الخارجية؟
ج4: دسنا الأرض اللى ما تنداس و بوسنا اليد اللى ما تتباس لا نابنا لا ذهب و لا نحاس

س5: ما هى سياسة مصر الداخليه؟
ج5: أضرب المربوط يخاف السايب

س6: ما هو نظام الحكم فى مصر؟
ج6: سمك لبن تمر هندى

س7: ما هو موقف الأخوان المسلمين من الحكم؟
ج7: عينى فيه و أقول أخيه

س8: بما تفسر الأداء الحكومى المصرى؟
ج8: إن كان هذا يكيدك أنا أزيدك

س9: بما تصف التصريحات الحكوميه؟
ج9: أسمع كلامك أصدقك أشوف أمورك أستعجب

س10: بما تصف زيادة معدل النمو فى مصر؟
ج10: إن كان الكذب حجة فالصدق أنجى

س11: بما تفسر التغيير الوزارى؟
ج11: ايه يعمل الترقيع فى الثوب البالى

س12: بما تصف الأخبار فى الصحافة الحكومية؟
ج12: قالوا الجمل طلع النخلة أدى الجمل و أدى النخله

س13: بما تفسر ميزانية برنامج البيت بيتك؟
ج13: اللى يعوزه البيت يحرم على الجامع

س14: بما تفسر تضخم ثروة أحمد عز؟
ج14: سبحان العاطى الوهاب من بعد الشبشب و القبقاب

س15: ما هو الفرق بين حزب الوفد و حزب الجبهة الديمقراطية؟
ج15: لا تعايرنى ولا أعايرك دا الهم طايلنى و طايلك

و فى النهاية أعزائى بعد ما شفنا قدرة المثل الشعبى المصرى على تلخيص الكثير من القضايا أحب أنهى حديثى بمثل شعبى أيضا لكنه فى تقديرى كان سبب من أسباب تعاسة الشعب المصرى ألا و هو:

' اللى تعرفه أحسن من اللى ماتعرفوش'

و طبعا هذا المثل إجابه لسؤال معروف أتركه لذكاء حضراتكم اعمالا بالمثل الشعبى الذى يقول

من خاف سلم

آسف يا غزة ....أنا جبان

الفيديو ده تصوير موبايل تقريبا واحد بعتلي اللينك بتاعه

والله من ساعة ما شفته وأنا فعلا مش قادر أمسك نفسي

وحسيت فعلا قد إيه أنا جبان لأني قاعد مكاني وإخواني يقتلوا بأبشع الوسائل والطرق

انا مش هعلق ع الفيديو ده لأني بصراحه مش قادر

بس هقول حاجه واحده

حسبي الله ونعم الوكيل في كل حاكم و محكوم كان في إيده حاجه ومعملهاش

و آه يا حكومة هز الوسط

طبعا معروف جدا عن النظام المصري مدي كرهه لحركة حماس

والأسباب كلها معروفه للجميع ومش محتاجه مناقشه

واللي يقول غير كده لا مؤاخذه يبقي أعمي أو مش بيفهم

والفيديو ده دليل من ضمن الأدله علي مدي كره النظام المصري لأي فرد من حماس

طبعا اللي في الفيديو ده غازي حمد المسئول الفلسطيني عن متابعة عمليات دخول الجرحى إلى الجانب المصري

وسائل الإعلام المختلفة راحت تسأله عن الأوضاع في القطاع وعن المقاومة

ويقوم جاي بقي واحد من رجالتنا اللي حامينا ورافعين راسنا ع الحدود بطرده بشكل مهين إلى الجانب الآخر (الفلسطيني) من رفح

وتحيا جمهورية مصر الصهيونيه

روحت وجيت من غير تيييييييت

يوم الاثنين 6/1/2009 الساعه 11.30 عبدالرحمن يتصل بيا ويقولي انت جاهز يا احمد

قلتله جاهز قالي تمام قلتله خلاص قابلني في المسجد نصلي الظهر ونتكل علي الله

واتقابلنا في المسجد ومشينا ركبنا الميكروباص لحد محطة مترو كلية الزراعه

دخلنا المحطه وبعدين امن الدوله وقفنا ..طبعا اللي وقفنا دا من منطقتنا

المهم خد البطايق ودخلنا في اوده في المحطه الكلام ده كان الساعه 1تقريبا

طبعا كل شويه يخشوا يغلسوا علينا كانوا تلاته لابسين ملكي ...قعدنا لحد العصر وصلينا

بعد كده دخل واحد منهم وبدأت بقي عقدة النقص بتاعته تظهر

قالنا متقعدوش واقفوا جنب بعض ...انا قلت يا مصبر الوحش ع الجحش

وقفنا بعدين دخل واحد تاني قال انتوا واقفين ليه فأومت له براسي ناحية اللي وقفنا ومحدش يقولي يعني إيه أومأت عشان انا اساسا مش عارف معناها

المهم طول ماحنا قاعدين عمالين نصبر بعض بالذكر والاستغفار ونثبت بعضينا

الساعه جت 4 كده لقيناهم داخلين قلت خلاص هنروح خدونا من ايدينا وخرجوا بينا بره

قلت كده تمام اوي بيوصلونا كمان لحد بره

خرجنا بره لقيت العربيه الزرقا مستنيانا قلت اهلا كده مفيهاش مرواح

ركبنا العربيه وبدأت تتحرك بينا وانا ببص بقي من ورا السلك اللي في الشباك ع الطريق وبقول لنفسي

ياااه المنظر صعب اوي من ورا السلك

وصلنا معسكر قوات الأمن المركزي اللي جنب القسم وفتحوا باب العربيه

ببص قبل ما أنزل لقيت تشريفه مستنيانا قلت ربنا يستر وجه في بالي ساعتها فيلم البرئ

و وانا نازل من العربيه انتظرت سيناريوا الفيلم انه يتنفذ بس الحمد لله متنفذش

اخدوا مننا الموبايلات وبعدين خدونا بقي لاوده كبيرة وهوه بيفتحها انا قلت اكيد جوه هيبقي مطحنه وبدأت اكثف الذكر والدعاء

دخلنا لقيت جوه يجي 100 واحد قاعدين يقروا اذكار المساء

تنفست الصعداء وارتاحت قلت هوه انتم هنا كان ناس من الغربيه والمنوفيه وعدة اماكن اخري

وطبعا الدم بيحن علي طول اول لما شفتهم اطمنت شويه وقمت اتوضيت وصلينا المغرب

بعد الصلاه اكلنا وشربنا الشاي وبدأ كم أخ يقول خاطرة وحان وقت صلاة العشاء

وانا قايم اصلي خطرلي خاطر معرفش ايه علاقته بالموقف اللي انا فيه بس هوه جه في بالي وخلاص

حسيت ان انا ربنا هيرزقني بزوجه صالحه بإذن الله

اغلب الوقت وانا في المعسكر كان بيدور في ذهني حاجات كتيير اوي منها والدى و والدتي وقلقي عليهم

كمان كنت ابص للجدران والارض واقول بكرة تشهد عليهم ان شاء الله

بعد صلاة العشا بدأت فقرات السمر والضحك والاناشيد

امال ايه ماهو لازم نهون علي نفسينا وبعديها كده ع الساعه 8 جه الظابط وقال يا جماعه انتو زي اخواتنا وكلمتين من دول

بعد كلمة انتوا زي اخوتنا دي احنا ركبنا العربيه الزرقا برده وطلعت بينا علي مقر أمن الدوله

قلت فعلا احنا زي اخواته

واحنا في الطريق بقي كنت بدأت اتوتر شويه خصوصا من كلام بعض الناس اللي كانوا راكبين معانا في العربيه عن التعذيب والكهربا

والافلام دي وقعدت بقي اذكر ربنا واستغفر انه يهون علينا

وصلنا هناك ونزلنا من العربيه

طبعا الحاجه الرئيسيه اللي بتعملها اول لما تروح هناك انك تغمي نفسك

غمينا نفسينا وبدانا نتحرك ونلف يمين وشمال لحد ما وصلنا لمكان بنفتح عنينا

لقينا نفسينا تحت الارض و زنازين ع اليمين وزنازين ع الشمال وزنزانه في الوش

المهم بدأ واحد في الكلام معانا واخذ بياناتنا وقالنا يا جماعه متقلقوش انتوا زي اخواتنا

اول لما قالي كده افتكرت الراجل الاولاني وقلت زي الفل

دخلنا قعدنا شويه وانا عمال بقي اتفقد المكان اللي اقل ما يقال عنه انه قذر جدا

شويه ونادموا عليا انا وعبدالرحمن و واحد تاني عشان التحقيق

قمت اخش الحمام واتوضي قبل ما اطلع

ودخلت الزنزانه اللي فيها الحمام وياريتني ما دخلت

ريحه ايه ومنظر ايه وحاجه زي الفل خالص قلت يلاا بقي نتوضي وخلاص

جيت اطلع بقي قالي استني غمي نفسك ...برفع التي شيرت اتغمي بيه

قالي لا ياحلو اقلع التي شيرت خالص ياعم انا هغمي نفسي وانا لابسه

قالي لا اخلعه ...خلعت التي شيرت وغميت نفسي بيه وبقيت بالفانله الداخليه والجو كان حر جدااااااااااا

وخدنا من ايدينا وطلعنا فوووق يجي 4 ادوار كده ولا حاجه

و وقفنا ادام حيطه وكان جنبينا اعتقد كنتين لاني كنت سامع صوت وشاي وقهوه بتتعمل وسبحان الله ريحتها تحس انها معموله من فلوس حرام

المهم خدوا عبد الرحمن يحققوا معاه وبعد كده جه واحد خادني من ايدي عشان اخش يتحقق معايا

وانا ماشي لاقيته بيقولي ايه يا شيخ انت بردان ولا ايه دا الجو حر وطااااااااااااااخ

طااااخ دي علي ضهري عشان محدش يفتكر انها في حته تانيه ...قلت اول القصيده كفر امال لما اخش جوه ايه اللي هيحصل

دخلت جوه والصمت يخيم ع المكان حوالي 10 دقايق ومفيش نفس وانا بستغفر ربي في سري وجت في بالي اغنية

قسامي والموت سلاحه تقولي ايه علاقتها بالموقف اقولك برده معرفش

المهم بدأ صاحبنا يتكلم ويقولي اسمك ايه يلااااااااااااااااااااااا

انا اللي اعرفه ان المد بيبقي 4 او 6 حركات انما ده بسم الله ما شاء الله مد يجي 10 حركات

ورديت عليه وبدأ يسال الأسئله اللي كلنا مذاكرينها وحافظينها في التوقعات المرئيه

خلصنا التحقيق والحمد لله بدون أي طاااخ أو تيييييييت

ودا طبعا بفضل ربنا وتثبيته

ونزلنا تحت و10 دقايق كده وادوني البطاقه

خدت البطاقه وقولت لنفسي اول الغيث قطرة

قعدت الوقت ده مع نفسي افكر في يجي مليون حاجه وبعديها لقيته بينده عليا روحتله

قالي خد كلم واداني التليفون بتاعه بقول الو لقيت زميل والدي اصله له معرفه جوه فكلمني وبعد كده قالي خد والدك هيكلمك

بقول ايوة يا بابا ولقيت والدي انهار ومقدرش يكلمني

طبعا المكالمه هزتني كتيير من جوه وقفلت خلاص المكالمه ورجعت مكاني وانا في غاية الحزن من المكالمه دي

مكنتش احب اني اسمع صوت والدي في الموقف ده وبالشكل ده

وده طبعا وترني زياده وقعدت ادعي ربنا انه يخلصني من الموقف ده علي خير

شويه كده يجي نص ساعه ونادموا علينا وادونا موبايلاتنا وبعد كده قالوا غموا نفسيكم عشان تخرجوا

غمينا نفسينا وبالفعل بفتح عيني لقيت نفسي في الشارع

يااااااااااااااااه أنا حر

اتصلت بسرعه علي والدي طمنته وقلتله انا جاي في السكه خلاص خرجت

وبقيت ماشي عاوز اركب طيارة عشان اروح اطمن والدي و والدتي عليا

وبقت الاتصالات تنهال عليا انا وعبد الرحمن من الزملاء والاصدقاء للاطمئنان

وأنا راكب الميكروباص ومروح قلت لعبد الرحمن تفرق كتييير اوي لما تبص وانت من ورا السلك

ولما تبص ومش ادامك سلوك

الكلام ده كان حوال الساعه 12.30 بلييل

و وصلنا الحمد لله منطقتنا وبيتنا علي خيير بعد تجربه 12 ساعه بالفعل كانت مفيده ومؤلمه نفسيا الي حد ما

وهييييييييييه ساعات حلوة الله لا يعودها

بس لما رجعت البيت وقعدت مع نفسي مجاش في بالي غير

قالولي بتحب مصر فقلت مش عارف

روحوا اسألوا مصر هيّه عندها الإجابات

حصرياً ... بالحكومة الصهيومصريه

وصلتنا هذه الرساله من المواطن المفقوع من حال البلد الأستاذ محمد عبد الجواد وذلك لعرضها في الخرابه دي قصدي المدونه

ونصها كالتالي:

منذ أن سمعت علي ذلك المصطلح "حصرياً " واستنتجت معناه من البرامج والقنوات التليفزيونية والفضائية والصحف حينما تنفرد قناة ما بنشر خبر أو تحقيق صحفي تكتب حصرياً أو قناة أفلام تنفرد بأذاعه فليم لأول مره أو سينما تنفرد بعرض فليم ما , فتكتب حصرياً .....

ومن هنا ربطت بين عده كلمات بمعني واحد تنفرد = حصريا = تعرض لأول مرة .

والآن ولأول مره حكومتنا المحترمة تنفرد بعمل فريد من نوعه علي مستوي العالم وهو منع وقمع المتظاهرين عن التعبير عن شعورهم تجاه القضية الفلسطينية الاسلاميه العربية بل ووصل الحد لاعتقال المتظاهرين ومنعهم من خلال فرق الكاراتية المدربة على فض التجمعات والمظاهرات والأمن المركزي وأمن الدولة في ظل الأوضاع الحالية وفي الوقت التي هبت فيه الدول العربية والغير عربيه بالمظاهرات المليونية حتى إسرائيل وأمريكا

والسؤال الآن :

هل ما يحدث من منع للمظاهرات بمصرنا الحبيبة هو توجيه من أمريكا وإسرائيل؟؟؟؟؟؟

وحينما يبحثت عن إجابه عن السؤال ما وجدت غيرإجابه واحده وهي إن الحكومة غبية نعم الحكومة غبية وعندها بلاها وعبط

وما تفعله الحكومة ما هو إلا محاوله للتقرب لأمريكا وإسرائيل وأظن أن أمريكا وإسرائيل لم تطلب منها ذلك لكن ما يحدث دليل علي أنها حكومة عميله

وهي محاوله لفرض سيطرتها القمعية لتقول للشارع المصري بكل فصائله وأحزابه وطوائفه بغض النظر عن توجهاته أيوه احنا موجودين والدليل اننا بنعتقل الرجال وبنضرب الشيوخ والنساء والأطفال والصحفيين فى كل مكان داخل بلدنا مصر ...... واللي عايزينه اعملوة .

أقول للحكومة

يا حكومتنا انتى محظوظة جدا لأنك استطعتى منذ أن تولي أبو جمال تربية الشعب على السلبية والتخاذل والجري وراء لقمة العيش ولكن هذه السلبية لن تدوم ولن تستمر وهناك بشريات نصر وهي ظهور شباب قادرين على التخلص من تلك الاوضاع المهينة والدليل علي ذلك ظهور شباب المدونين وشباب الجامعات المصرية بمختلف انتمائاتهم وشباب 6 إبريل وغيرهم .

وأخيرا ........... إذا كانت دولة الظلم ساعة فدولة الحق ستظل إلي قيام الساعة

وحسبي الله ونعم الوكيل

مش عارف ليه بعد ما قريت الرساله دي وانا نفسي اسمع أغنية

متدمعيش يا عين علي اللي عدي وراح

هوه ده الفرق

طبعا الصور دي في منها اللي جديد وفي منها اللي قديم

بس أنا حبيت أعمل مقارنه بسيطه بين الشعب صاحب الأرض والحق وبين الصهيوني المحتل

نيجي بقي ع الناحية التانيه

كنت اتوقع في بداية الموضوع إني هكتب تحت كل صورة تعليقات وهحط صور كتيير من اللي مجمعها

بس صراحه ملقيتش اي تعليق خالص يتكتب لان الصور مش محتاجه

وفي النهايه سيزول المحتل وسيبقي صاحب الأرض

ستزول الدوله المزعومه وستبقي فلسطين الأبيه

ستزول دولة الظلم وستبقي دولة الحق

ستزول ياللي في بالي وسيبقي من هم أحق

من النهارده مفيش حاكومه

انتظروني في نقل تجربة احتجازي 12 ساعه مابين المترو ومعسكر الامن المركزي وامن الدوله وتحقيقاته معي

اعتذار

لا تزال غزة صامده بفضل الله عز وجل ولا تزال المقاومه الأبيه تدافع عن شرف الأمه وعرضها

ونحن هنا نحاول أن ننقل ماذا تفعل المقاومه بالجيش الصهيوني المحتل وفي إطار التغطيه الإعلاميه لنشر

أخبار وصور عن المقاومه وصلتنا صورة قيل إنها عملية أسر صهيوني وقمنا بنشرها علي هذا الأساس

وأكد البعض من الملتقي القسامي انها بالفعل صورة لعملية أسر والبعض جعلها كتوقيع له

ولكن تأكدنا بالفعل أنها صورة من التدريب للقساميين علي أسر الصهاينه

وما أن تأكدنا من ذلك ننشر هذا التصحيح وعلي نفس المدونه لنؤكد أننا نسعي إلي نشر الحقيقه ولا نأتي بأخبار غير صحيحه

ونعتذر عن هذا الخطأ غير المقصود ونعدكم إن شاء الله بنشر صور للمقاومه ستشفي صدوركم بإذن الله

عاجل الاخبار حتي 11.50صباحا

كتائب القسام تقصف مدينة المجدل بصاروخي غراد

سرايا القدس تستهدف دبابة علي جبل الكاشف بعبوة زلزال ثلاثة المتطورة وتعلن ان الدبابة تطايرات اجزائها والنار ما زالت تشتعل في برجها

كتائب القسام تعلن عن اطلاق صاورخي من نوع غراد علي موقع حتسور الجوي شرق شمال كريات ملاخي

واسرائيل تعترف ب11 صاورخا من الصباح حتي الان

اشتباكات عنيفة تدور في محور محيط جبل الكاشف بين المقاومة الفلسطينية والجيش الإسرائيلي

القسام يستهدف قاعدة جوية جديدة لاول مرة في إسدود

عاجل الاخبار حتي الحادية عشر صباح اليوم

اطلق المجاهدون قذيفتي آر بي جي تجاه جرافة وآلية صهيونية شرق حي التفاح

العـدو يعـترف بإصابة خمس من جرذانه في مواجهات ليلة البارحة

كتائب العز القسامية تطلق صاروخ غـراد على مغتصـبـة اسـدود

سقوط 10 صواريخ غراد وقسام على المستوطنات القريبة من القطاع منذ الصباح

حتي الآن 6 عمليات قنص من قبل المقاومه

كتائب القسام تطلق صاورخ من نوع ساندام علي ناقلة جند علي جبل الريس وتدميرها بالكامل

عاجل من غزة

عاجل

### مراسل الجزيرة: إخلاء مصابين من مستشفى الشفاء الى مستشفيات اخرى نتيجة الضغط وتزايد عدد الاسرى
### صابة 4 جنود صهاينة في الدقائق الاخيرة
### تحليق مكثف لطائرات الكيان الصهيوني في سماء غزة الان.