من حريه وقوميه إلي بابا أوبح يا شعبي لاتحزن

زمااااااااان وأنا صغير عندي حوالي 10 سنين كده كان بيجي علي التليفزيون المصري أيام ما كان تليفزيون يعني كليب جميل أوي بيرسخ عندنا كأطفال مفاهيم جميله بأسلوب أجمل يجعلك تعشق كل معني من هذه المعاني وتحسها بكل كيانك وأنت مازلت في هذه السن الصغيرة ( ياسلام يابني علي الكلام الكبير)

ماما بابا وطني علمي

حريه قوميه سلام حمام

جندي بلدي شجاع



أحببت أن أضعه اليوم بين أيديكم لكي تقارن بنفسك الفرق بين مصر من 12 سنه ومصر الحاليه

لو جينا بقي بصينا علي المعاني دي دلوقتي هنلاقي إن :

بابا بابا حسني طبعا أبو المصريين كلهم

ماما أكيد ماما سوزان مراة أبو المصريين تبقي هيا أم المصريين مش محتاجه فهلوه

وطني عايش غريب فيه

علمي داسوه بالجزم ولا ال.........

حريه بحلم اشوفها قبل ما اموت

قوميه من زمااااااااان مسمعتش عنها

سلام السلام هوه الخيار الاستراتيجي ( ده طبعا عند أم ترتر)

حمام الرئيس كان جعان فدبحه وأكله بالهنا والشفا

جندي انقرض والموجود دلوقتي عسكري أمن مركزي

بلدي باعوها بالرخيص ومش لاقينها حتي العيش البلدي مش لاقينوه

شجاع ده اللي هوه أنا ( أصل أنا بحب أتفشخر)

وياسلام بقي لما تتصدم بالواقع الأليم وتشوف الأغاني الجديده اللي بيربوا عليها الجيل الجديد

جيل بابا أوبح

بابا يقول لماما دح بابا اوبح

تاتا فيها واوا يح بابا أوبح

هوه ده الفكر الجديد اللي عايزين يربوا الجيل اللي طالع عليه

وفي النهايه يبقي سؤالا واحدا يفرض نفسه علي الساحه وهو

مين هوه بابا أوبح؟