شعب معندوش ثقافة البي بي

في البدايه كده انا بقدملكم يا جماعه 3 اعتذرات

الأول ودا عشان إتأخرت في تنزيل موضوع جديد علي المدونه
الثاني ودا عشان مقلتش كل سنه وانتم طيبين بمناسبة العيد واديني بقولها اهوه ومعلش جت متاخرة
الثالث ودا بسبب اختيار العنوان بتاع الموضوع ده بس صراحه ملقيتش غيره اعمل ايه بقي حاجه تقرف


الموضوع بكل بساطه انه طبعا في الفترة الأخيرة ظهر تنظيم إسمه الماس الكهربي يتزعمه حمدي سلكه وشعبان قفله
والتنظيم ده اعلن مسئوليته عن الحرائق التي حدثت في الفترة الأخيرة في مصرنا المحروسه (الحمد لله طلعتي بريئه يا حكومه)

وعشان تكمل براءة الحكومه كارثة الدويقه طبعا مكنش فيها حرايق يعني تظيم الماس الكهربي برئ واكيد برده الحكومه بريئه

أمال يا تري مين ابن الكلب اللي ورا الموضوع ده

واحد ابن حلال شغلته مصدر مسئول في وزارة الاسكان (ربنا يحفظه ويعلي مراتبه) طلع من الحمام قصدي طلع من الوزارة وكشف السر الخطير والأمر الفظيع والصدمه التي كادت أن تفقدني الوعي عندما أعلن من المسئول عن كارثة الدويقه

الراجل قال أن السبب الرئيسي لكارثة الدويقة هو غياب السلوكيات السليمة وسوء التعامل مع دورات المياه مما أدى إلى تأثر الهضبة سلبيا بسبب تلف مواسير الصرف وربما هو ما أدى إلى انهيار الهضبة فوق المواطنين

وقال المسئول لـجريدة المصري اليوم: هناك أساليب خاطئة لاستخدام الحمامات يقوم بها سكان المنطقة، هذه الأساليب تسببت في تلف مواسير الصرف، وتسريب جزء كبير من المياه إلي صخور هضبة المقطم، مما أدي إلي تفككها، وبالتالي إذابتها وانهيارها.

وأضاف المسئول: قررنا عمل حملات توعية للمواطنين في المنطقة بعد نقلهم لمساكن التطوير خلال المرحلة المقبلة، وذلك لتعريفهم بكيفية استخدام الحمامات والأحواض

وكشف المسئول عن أن جزءاً من هضبة المقطم بجانب الجزء المنهار في منطقة منشأة ناصر يحتاج إلي نحو 60 مليون جنيه لتدعيمه وتثبيته معمارياً، مشيراً إلي أن هناك اتجاهاً لتخصيص هذا المبلغ، لبناء وحدات بديلة لأهالي المنطقة وإزالة جميع المباني فوق الهضبة.

شوفتوا بقي إن الحكومه طلعت بريئه إزاي وإن احنا السبب في الكارثه عشان مش بنعرف نستخدم دورات المياه
بس انا ليا عتاب صغير علي المسئول اللي كشف السر الخطير ده
يعني أنا بس كنت عاوز اعرف طيب يعني ايه مش بنعرف نستخدم دورات المياه
والله سؤال برئ يعني مثلا هوه يقصد بكلامه ده الناس اللي عندها حمامات افرنجي ولا حمامات بلدي
ولا كان يقصد إن الناس مش بتشد السيفون بعد ما بتخلص

ياخبر أسود يا جدعان بقي شعب حضارة ال7000 سنه مش بيعرف يعمل بي بي لحد النهارده

أنا دلوقتي عرفت السر ورا تأخرنا إن احنا مش بنعرف نعمل بي بي ايوة لازم نعترف بالحقيقه المره دي

وصدقت الحكمه اللي قالت الاهتمام بالمؤخرة يجعلك في المقدمه

ياريت نحط الحكمه دي في عين الاعتبار ونشد عليها السيفون

ومن هذا المزنق أنا بناشد الساده المسئولين في الحكومه وقبلهم طبعا السيد الرئيس والسيده الفاضله سوزان مبارك راعية الثقافات في مصر

انهم يعملوا وزارة جديده يسموها وزارة المراحيض عشان يهتموا شويه بالمواضيع الجامده دي
انهم يضيفوا ماده جديده تدرس في المدارس اسمها ازاي تعمل بي بي ويدرسوها للطلاب نظري وعملي
انهم يعملوا حملة توعيه في التليفزيون عن ثقافة استخدام الحمامات وياريت الحمله تشمل النوعين البلدي والأفرنجي
ان الحزب الوطني السنه دي في المؤتمر بتاعه اللي هيعمله يكون تحت شعار

(حمـــــــامنا بيتقدم بينا )

وفي النهايه إلـــــهي يارب المسئول اللي طلع الكلام ده يتزنق زنقه وميعرفش يفك لا في حمام بلدي ولا أفرنجي ويموت بسببها

اللهم امين

وفي النهايه دمتم بود و حمام الهنا إن شاء الله

ملحوظه أخيرة وهي إذا لم تعجبك التدوينه شد عليها السيفون

تشششششششششششششششششششششششششششششش

تحديث بسيط: تم إزالة الصورة الموجوده بالتدوينه لمراعاة شعور الآخرين